थेऊर

इतिहास

यानंतर आले ते नवाष्मयुग आणि त्यानंतर ताम्रपाषाणयुग. या ताम्रपाषाणयुगात तर पुण्याच्या परिसरात मानवी वावराच्याच नव्हे, तर चक्क वसाहतीच्याही खुणा संशोधकांना आढळल्या आहेत. या दोन्ही युगांच्या उंबरठ्यावर महाराष्ट्रात स्थिर जीवनाची सुरुवात झाली, ती साधारण साडेचार हजार वर्षांपूर्वी, तापीच्या खोऱ्यातून. तिथून पुढे साऱ्या महाराष्ट्रात या आद्य शेतकऱ्यांनी आपल्या वसाहती स्थापन केल्या. पुण्याच्या परिसरात इ.स.पू. चौदाशेच्या सुमारास सर्वप्रथम अशी वसाहत झाली. ती होती सध्याच्या थेऊरमध्ये, मुठा नदीच्या उजव्या तीरावर. परंतु, इ.स.पू. एक हजारच्या सुमारास वारंवार दुष्काळ पडू लागल्यानं या शेतकऱ्यांच्या वसाहती उजाड झाल्या. ही दैन्यावस्था पुऱ्या महाराष्ट्रातच पाच शतकांहून अधिक काळ टिकली.