सारसबाग

इतिहास

आजच्या सारसबागेचं स्वरूप पेशवेकाळापेक्षा पूर्णतः वेगळं आणि आटोपशीर असलं, तरी त्याकाळी ही बाग पर्वती तलावाचा एक भाग होती. ओढ्याचा प्रवाह वळवल्यानंतर, भविष्यातील पाण्याची गरज ओळखून पेशव्यांनी पर्वतीच्या पायथ्याशी सुमारे २५ एकर क्षेत्रावर एक कृत्रिम तलाव खोदला होता. हाच तो ऐतिहासिक तलाव, ज्याच्या मधोमध आजची सारसबाग आणि सणस मैदान उभं आहे. तलाव खोदताना तिथं अनेक नैसर्गिक झरे लागल्यानं त्यात वर्षभर पाण्याचा मोठा साठा उपलब्ध असे. तलाव खोदताना पेशव्यांनी त्याच्या मध्यभागी सुमारे २५,००० चौरस फुटांचं एक कृत्रिम बेट राखून ठेवून त्यावर एक सुंदर बाग विकसित केली.